سايىستىڭ شىمىلدىعىن 15 قىركۇيەكتە ميحايل كۋكۋشكين مەن گۆيدو پەليۋ اشتى. قوس تەننيسشى اراسىنداعى كەزدەسۋ ءتورت ساعاتقا سوزىلىپ, ءتورت سەتكە دەيىن وينالدى. العاشقى سەتتە ەسە جىبەرگەن جەرلەسىمىز 6:7 (5:7), قالعان ءۇش سەتتە قارسىلاسىنان باسىم ءتۇستى. ناتيجەسى مىناداي – 7:6 (7:5), 6:2, 6:4. بۇل جەڭىسىمەن كۋكۋشكين (سۋرەتتە) قۇراماعا العاشقى ۇپايدى سالدى. ماتچ اياقتالا سالا كورتقا قازاقستاندىق تەننيسشى دميتري پوپكو مەن ارگەنتينالىق ديەگو شۆارتسمان شىقتى. وكىنىشكە قاراي, اتالعان كەزدەسۋدە پوپكو قارسىلاسىنا 6:4, 6:2, 6:2 ەسەبىمەن ەسە جىبەرىپ قويدى. ءسويتىپ, قازاقستان-ارگەنتينا قۇرامالارى اراسىنداعى ەسەپ تەڭەستى.
جارىستىڭ ەكىنشى كۇنىندە تەننيسشىلەر جۇپتىق كەزدەسۋ وتكىزدى. بۇل سىندا الەكساندر نەدوۆەسوۆ پەن تيمۋر حابيبۋلين جۇبى ارگەنتينالىق تەننيسشىلەر ماكسيمو گونسالەس پەن اندرەس مولتەني دۋەتىنە قارسى وينادى. العاشقى سەتتە قارسىلاستارىنا جول بەرىپ قويعان وتانداستارىمىز قالعان ءۇش سەتتە قايسارلىق تانىتىپ, ارگەنتينالىقتاردى 5:7, 6:4, 7:5, 6:4 ەسەبىمەن جەڭدى. ءتۋرنيردىڭ سوڭعى كۇنىندە ميحايل كۋكۋشكين ديەگو سەباستيان شۆارتسمانمەن سىنعا ءتۇسىپ, ءۇش سەتتە 6:4, 6:4, 7:6 (7:2) ارگەنتينالىق تەننيسشىنى قاپى قالدىردى. كۋكۋشكيننىڭ بۇل جەڭىسى تەننيستەن قازاقستان ۇلتتىق قۇراماسىن دەۆيس كۋبوگىنىڭ الەمدىك توبىنا شىعاردى.
ەسكە سالا كەتسەك, ءبىر عاسىرلىق تاريحى بار تۋرنيرگە قازاقستان قۇراماسى 1995 جىلدان باستاپ قاتىسىپ كەلەدى. وتانداستارىمىز الەمدىك توپقا العاش رەت 2010 جىلى شۆەيتساريانى جەڭگەننەن كەيىن شىقتى. سودان بەرى قازاقستان قۇراماسى دەۆيس كۋبوگىنىڭ الەمدىك توبىنا تۇراقتى قاتىسۋشى اتاندى. 2011, 2013-15 جىلدارى شيرەك فينالعا دەيىن جەتتى. بۇل – قۇرامامىزدىڭ بۇگىنگى كۇنگە دەيىنگى ەڭ ۇلكەن جەتىستىگى.
ءالي بيتورە,
«ەگەمەن قازاقستان»
